Merry Christmas & Happy New Year!!!!!

I just wanted to take a moment to wish everyone a very Merry Christmas and a wonderfully Happy New Year!

Discoteca!

Finalmente dopo do mesi go rivà meter pie in una discoteca!
No che sia un patido, ma star do mesi nela capitale dela musica senza andar a balar, xè come andar in stadio a vardar l'Udinese, l'esempio rendi l'idea?
Zena a casa dela stravagante Anita a base de vin bianco, vin nero, champagne(quà va sai) e un poca de pasta all'arrabbiata. Musica in bomba, mule che bala per tuto e mi che drinco senza parole anzi qualche parola ognitanto me vegniva.....

Verso mezanote se semo finalmente direti in una bela discoteca in Port Melbourne, l'Ocean Blue, dove son entrà(anca gratis)solo grazie ale mulone, perchè le conoseva i paroni(solita mafia,ma in fin di bene), se iera per i miei jeans e canotiera iero ancora là!
Selezione molto fiscale, 70% de babe e che babe, musica dance anni '90 e mi con tre babe. Gnanche nei migliori anni no ndavo cusi forte:-)!

Bon finalmente gò sagià anca questa e devo dir che da quela sera le discoteche me piasi un poco de più:-), spero de rivarghe andar ancora, anche se d'ora in poi, in giro per l'Australia da solo e senza mafiade, in questo tipo de discoteche no credo rivero più meterghe piè, quà i xè pezo che al Colonial!

Wineries!

Grazie al mio braccio "sinistro" Silvia e al mio braccio "destro" Sara, go conosù un'altra bela tradizione locale, il "wine tasting" ovvero degustazione di vini. Consisti semplicemente nel trovar un'astemio che guidi, e dirigerse poche decine de km fora de Melbourne in cerca delle numerosissime "Wineries", una sorta de agriturismi nei quali però produci e vendi solo vin.

Il giogo consisti nel farghe visita e sagiar le varie qualità de vin che i gà e dopo dir "this is nice", tanto per far contenti i wineristi, che no mancherà de reinpinirte el bicer a volontà,(come se no i savesi che semo vegnui solo x bever) fin che te stà in pie! Il tutto completamente gratis! Gran bela roba, posti stupendi, natura incontaminata, ottimi vini x chi capisi ed il tutto xè free!

Pena che parto per il mio tour no mancherò de farghe visita ancora, con la taconera podendoghe dormir dentro diventa una tappa irrinunciabile!

Aprofito de stò post per ringraziar infinitamente stè dò mulone, me iero promeso de no frequentar italiani per motivi de lingua ma de lore veramente no go podù far a meno, dopo un'ora insieme me pareva zà de conoserle de anni, sempre pronte ad aiutarme ed a invitarme ad uscir, due persone stupende che me gà fato sentir come a casa!

Mulone me mancherè!

27 anni .....

..... e me zogo ancora in giro pel mondo!
E già, domenica 2 Dicembre go compiù 27anni, el mio primo compleano cusi lontan de casa, strana roba, il mio primo compleano in Australia e chisà che non sia il primo de tanti…..mamma tranquila, scherzo :-)
Grazie ala complicità della solita Amanda e dei tanti novi amici acorsi, gavemo festegiado al Riverland, un bel local in riva al fiume Yarra, sotto Federation Square, bel postisin, con tavoli e barbecue all’esterno e pien de gente de tuti i tipi, borghesini locali, studenti e sbrisurie varie.
Gavemo magnà un poche de sausages e bevu tanto vin e bira, come ai veci tempi!
Dopo verso mezanote credo(go qualche vuoto de memoria), insieme ai sopravissuti, circa una quindicina, se gavemo sposta nela piaza sovrastante, la famosissima Federation Square appunto, dove semo andai a scasarse un per de orete e dove soprattutto go trovà la mia bira preferita, la Little Creatures Pale Ale, mamamia quanto che xè bona, pena trovo un’oferta me compro un bancal da meter in furgon!
Verso fine serata, i superstiti, ovvero mi, Anita, Anna e Merrin(una mula de Sydney conosuda x strada) se gavemo conceso un’ultima tappa al Lounge, uno dei pochi locai verti a quele ore dove dopo l’ultimo bicer, gavemo simultaneamente cedudo, tuti insieme allegramente.

Aprofito del blog, anche se sai pochi capirà el mio triestin, x ringraziar tute le persone accorse a farme compagnia e a darme affeto, me gave fato sentir come a casa!
El giorno dopo inveze la mitica Teta Zora, gà organizà un ottimo barbecue a casa sua con alcuni parenti, molto più salutare e viste le condizioni con cui ghe son rivà, molto opportuno :-)
Magnada de carne, vin de tuti i colori, do ciacole in Istrian, altre do in Inglese e altre do in Italian, ciò, parlo tre lingue :-)

Non finirò mai de ringraziar i parenti quà a Melbourne, per quanto i me aiuta e me stà vizin, gente stupenda, sembra che da un momento all'altro xè disposti a ciorse la vita pur de aiutarte, robe che no se vedi speso!

Grazie a tuti!

Taconera Australiana

Dopo un estenuante ricerca, finalmente me son comprà la nova taconera, quela che sara la mia casa per i circa 10 mesi restanti, nei quali conto de girarme l’intero continente, tempo permettendo.
Ghe go meso un bon meseto per rivar comprarla, no xè stà facile anche perché adeso quà xè estate e i furgoni va via come el pan, la gente va in ferie e i turisti inizia a viagiar e quindi xè tuti che vol el furgon. Fe conto che me xè scampai almeno un cinque, per question de minuti, prima de trovar questo. La matina ale 8 compravo el giornal e ale 9 iera zà vendui, disperazion, fino a quando me son deciso a meter anunci su tuti i siti de compravendita australiani, dove go scrito che son in zerca de un van con determinate carateristiche, in questo modo son stà contatà probabilmente prima che i meti l’anuncio e cusi go rivà combinar.
Lo go comprà da una coppia de cinquantenni canadesi, che lo ga usà 3mesi, percorrendo el tratto che va da Cairns a Melbourne, circa 3500km. Sti povereti, i ga avudo tute le sfighe, i ga rivà spacar il spacabile in sti 3mesi, i me ga presentà 7000$ de fature, prima i gà rifato la testa in pien, dopo i gà rigenerà completamente el motor, dopo i gà sostitui el cambio, cambiado le gome, cambià el parabrezza, batterie, motorin de aviamento, e dozine de altre riparazioni minori, incredibile!
Due xè le robe, o el xè nato mal e quindi paghero vanti anca mi, opur el xè come novo!
Detaglio interessante, xè stà l’enorme burocrazia richiesta per la vendita, bicer de rachia e carta de formajo dove i mati dichiara de vendermelo, in data…., per $......, firma. Pila in man e fato el lavor! Sconvolgente!
Venimo ala descrizione tecnica, prima roba, optional de grande importanza, Aria Condizionata, coi 40°-50° che becherò in giro, disemo che sarà de vitale importanza! Ga 5 posti a sedere se me li omologa, altrimenti 3, un leto matrimoniale quasi normale, un leto matrimoniale picio, frigo, lavandin, micronde, due fornei x cusinar, una specie de forno e diversi armadietti zà pieni de tuto l’ocorente per cusinar e magnar. Dito cusi no sembra gnanca mal, ma se volemo eser più precisi e svalutarlo un pochetin, va dito che il frigo va solo a 12 o 220 e non a gas, el lavandin no ga la pompa elettrica ma solo quela a man, che il micronde ga zento ani, che i leti xè pici, che le dò finestre alte xè senza guarnizion e piovi dentro, che tuti i mobili xè senza vide, ancora do busi e casca zò tuto, el portelon de drio se verzi co vol lui e no gà la radio.
Insoma fe una media tra i pro e contro and that’s it!
I contro li go zà inizià a ridur spendendo ore su ore nel mitico box de Teta Zora, xè meo de un’oficina e ve diro la verità, me stago anche divertindo, ciò xè quasi 2 mesi che no smonto e rimonto niente, chi che me conosi me pol capir :-) !
Mentre mi trapolo, fortunatamente i miei parenti i me stà organizzando le facende burocratiche che qua nel stato del Victoria xè piu complicade e costose che in qualsiasi altro stato australian!
Prima go de far el RoadWorthyCertificate che xè praticamente la nostra revision, dopo le targhe e la Registration, che xè l’asicurazion per i danni causai a persone. Facoltativo, ma xè meo che fazo, xè l’asisicurazion contro terze parti e la casco; costo de tuti sti scherzi circa 1000$! Una bela scioca, più de cusi quà no te pol costar, mi me costa sai perche devo praticamente reimmatricolarlo visto che el proveniva da un altro stato(Qeensland), disemo che xè come se voi comprasivo la machina in un paese extra UE. Me consola solo el fato che far tuto questo in Italia, me costasi sicuro piu del dopio, se non anca el triplo!
Bon spero solo che non el me cedi strada facendo, perché se me capita tuti i casini che xè capitai ai paroni prima, ste sicuri che lo buto drito in mar, cusi diventa un novo relitto da visitar!
Ma con tuti i portafortuna che me gave regalà no devo gaver paura de niente :-) !!!!!

Great Ocean Road

Finalmente dopo anni che sogno de meterghe pie, il sogno se gà realizà, son stado sula Great Ocean Road, la strada costiera probabilmente più spettacolare al mondo!

Se trata de circa 200km de strada, ciamemola statale, che per bona parte costegia l’oceano pacifico, con tochi a livel del mar e altri molto piu sugestivi rampigai sul coston! Ga una storia sai particolare, pensè che la xè stada costruida da 3000 ex militari dopo la fine della Prima Guerra Mondiale, dal 1918 al 1932, rientrai in patria, senza lavor e senza un, lo stato ghe ga dà lavor fazendoghela costruir e de conseguenza dandoghe un salario, ottima idea e good job!
La inizia dala città de Torquay e la prosegui atraverso innumerevoli località famose fino a Warnanbool, dove la strada abbandona la costa e se taca con la strada statale principale che colega Melbourne ad Adelaide.
Quindi partendo da Torquay appunto, xè tuto un suseguirse de spiage, punti panoramici favolosi, parchi nazionali e paeseti vari.
Noi semo partidi la domenica matina, ierimo mi, mia cugina col moroso Paul e l’amica Susy, ovviamente istriana anca ela :-)
Da Melbourne dopo un centinaio de km, gavemo fato pausa capucino a Geelong, credo sia la seconda città x popolazion quà nel stato del Victoria, carina, pozada su una colina con vista su Philip Bay(xè el golfo de Melbourne e provincia), però sai fiaca, no ghe iera anima viva, sembrava a momenti quasi una cità in guera, come se ghe fosi el coprifuoco :-)
Bon dopo Geelong gavemo fato tapa direta a Torquay, anche ciamada “Surf City”, punto di partenza dell’itinerario, sai bela e agiata, la xè piena de factory outlet de marchi famosi come Billabong, QuickSilver e te vedi tavole de surf ovunque, ancora un poco le vendi anche in paneteria! Ghe xè perfin el museo del surf, che gavemo anca visitado! Disemo che xè una cità commerciale, basada esclusivamente sul surf e dintorni, la vivi de questo e de turismo per ricchi.

A differenza dele cità seguenti, xè probabilmente la più cara perché, oltre ad eser sula strada più bela del mondo, la xè alo steso tempo vicina a grandi cità come Geelong e Melbourne. Savè come xè, i richi no ga voia de far tropi km per andar a surfar o stravacarse in spiaggia, quindi questa xè la loro prima scelta!
Bon ndemo vanti, dopo qualche dozina de km gavemo fato sosta a Bells Beach, pranzo al sacco, anzi in baul, grazie ala mitica Amanda, che gà preparà panini multigusto per tutti. Dovè saver, perché mi no savevo che Bells Beach xè, insieme a Whaikiki alle Hawaii, considerada la migliore spiaggia al mondo per praticar el Surf! Non ste domandarme el perché, dopo ghe iera spiage zento volte più bele e con le stese onde…..buh! Qua i ga girà anche el famosissimo film “Point Break”, che mi ovviamente no go mai visto :-)

Proseguendo gavemo fato sosta ancora in un paio de spiage de cui no me ricordo el nome, fino ad arivar a Lorne, dove nel tardo pomeriggio gavemo cercà e trovà un favoloso ostel, imerso nel bosco tra pappagai e usei de tuti i colori, fiumisel a fianco con relative cascate qualche centinaio de metri drio, camerate fate tute de legno, rampigade sula colina e 20euro a notte, benon!

Pozade le valige gavemo fato un scampon nela spiaggia sottostante, veramente bela, dove go fato il mio primo bagno nell’Oceano! Acqua iazada, andava tuti in acqua con la muta ma mi temerario e ansioso de sciocarme contro le onde son andà in acqua con le braghete dell’Unione e basta, no gavevo altro :-)
Piccola parentesi, ste braghete le go ciapade ala finale playout a Vicenza e le porta el n°7, del grande Princi, mio compagno nei indimenticabili anni delle giovanili dell’Unione. In più lui no sa neanche de gavermele butade indoso a mi, rambigado sula ringhiera del stadio Menti…..un giorno devo dirghelo ;-), chiusa parentesi.
Verso le 8 gavemo fato ritorno in ostel, docia veloce, cena sempre grazie ad Amanda e do ciacole insieme a dò muloni de Perth, che i se stà fazendo tuta la costa sud surfando strada fazendo e un strano mato svedese, che sembrava più un bosniaco per come iera zurlo, ma cmq cocolo, alla sua quinta vacanza in Australia.

La matina seguente, partenza ale 8 (me son riva svear solo!) direzione vanti drito, anzi direzion e sosta al “Kennet River Park”, un parco che funzia anche da campegio, dove te pol pascolar e, altro esordio, veder i Koala! Che bestia inutile, se scioca de eucalipto e dormi tuto el giorno, però devo ameter che xè veramente cocoli, xè come dei pupoloti, te li trovi rampigai pei alberi in posizioni assurde e precarie a spavar seranamente!

Tappa seguente, qualche km più avanti xè stado l’Otway National Park, una piccola foresta tropicale che se pol visitar attraverso un percorso guidado, sembrava de eser in un film, palme e piante tropicali de ogni tipo, alberi giganteschi, mai visto prima alberi cusi grandi, roba de 5mt de diametro e risceletti che scoreva soto le passerelle.

Pochi km dopo sto parco gavemo fato sosta in un local sai bel, tipo una gostilna istriana, tuto in legno e circondado da distese immense de prati verdi pieni de vacche al pascolo, sai suggestivo e soprattutto indimenticabile perché in sto local per la prima volta go asagià la Ginger Beer, fantastica, ga poco a che far con la bira, xè una bibita analcolica, leggermente gasada al gusto de zenzero, non immagine che goduria beversela fresca!

Disetai e contenti, finalmente gavemo puntà l’atrazion principale dela gita, i “Twelve Apostoles”, che meraviglia dela natura, xè veramente un spettacolo, robe de star pozai ore sula ringhiera a vardarli come i vien investidi dale onde, sto rumor e profumo de mar con sto sfondo xè come una magia, te incanta! Ghe xè diversi punti dai quali te pol amirarli, xè tuto ben organizado grazie a pasarelle e sentierini che te porta in diversi punti de oservazion, purtroppo oggi giorno a causa dell’erosion provocada dal mar e dale sue forti onde, ghe ne xè rimasti solo che sei, e non so ancora x quanto, pensar che un giorno i scomparirà e vegnerà inghiotidi dal mar xè un vero pecà ma la natura devi far el suo decorso e cusi sarà.

Dopo i mitici Dodici Apostoli, pochi km dopo xè stada la volta de veder un’altra meraviglia della natura, el London Bridge, o meglio ex Bridge perché circa 2anni fa xè crollado in mar creando de conseguenza una sorta de altro apostolo, solitario, staccà dala terra ferma.

Viste le attrazioni principali, ultima tappa, Warnanbool, città che segna la fine della Great Ocean Road, città molto pulita e perfettina, piena de parchi per fioi e villette signorili ma che ricordo con un poca de tristezza perché rivadi là, ga segnado per noi la fine de stà gran bela gita :-)

Nova riceta per l'influenza!

Xè un dò giorni che no stago sai ben, mal de gola, fiaca, un pochetin de voltastomigo, insoma tuti sintomi de influenza.
Per Melbourne xè una roba normale, credo de eser l'unico fra i miei conoscenti Melbourniani a gaver resistido fino ad adeso, col tempo selvadigo che xè quà, xè all'ordine del giorno ciapar fredo e mal de gola.
Bon ieri, iero casa tuto el giorno a riposar, la mattina me son sveia ale 11, comodo, colazion e riposin in giardin sula sdraio. Verso la 1 pranzemo e infiachido ancora de più sto giro me buto a riposar in camereta perchè xè più fresco, fora iera 31°! Verso le 4 riva mio cugin Luigi, el caciator, el me sveia e me conza in man una bela bira fresca, cusi pena alzado, e visto che dir de no xè bruto, aceto soridendo. El problema xè che iera la prima de 5 :-)
Verso le 6 mia Zia la ne presenta la zena, semo mi, ela e Luigi; gnochi con la galina!
Come femo, no xè piu birete! Presto risolto, mia Zia come ogni giorno la se ciapa e la va in konoba, la impinisi la bucaleta de vin nero, ed eco fato!
Finida la zena son pien de magnar e pien de bever e con l’influenza J, Luigi va a casa, abita a 500mt da qua e mi me meto in soggiorno a vardar la television con Zia. Cosa trovemo…il Beckham Day, xè tuti i canali che parla de lui perché da là a poco stava per iniziar la partida de balon amichevole tra Sydney e Los Angeles dove apunto zoga el picarin.
Bon vardemo la partida, 1°tempo 3-1 x Sydney, poderè imaginar che spettacolo vardar zogar australiani contro americani, el massimo, xè come dir Kringa contro Pisin. Disemo pur che no xè per lori, lasemoli col Cricket!
Durante il riposo tra primo e secondo tempo, mia Zia me consiglia una bela camomilla calda con tanto zucchero, limon e dulcis in fundo Rachia(grappa,anche qua!)! Le dosi le fa ela, una camomilla petardo, co bevevo me lagrimava i oci!
Il giorno dopo?
Iero come un fiorelin, completamente guarido!
Funziona!
Quindi se stè poco ben, quà sora trovè la riceta magica, per di più colaudada!

Studiar.....no rivo!

Questa xè la mia quarta e ultima settimana de scola.
Go deciso de molar per 2 motivi;
- costa troppo, 1330$ x un mese!
- no ghe la fazo più, studiar no xè per mi, no gò pazienza!
A parte questi due “inconvenienti” xè stada comunque una gran bela esperienza, go fato tante amicizie, go conosù persone da tuto el mondo, le loro culture, le loro abitudini e go condiviso tanti bei momenti. E per di più tuto in Inglese :-)
La scola credo che sia servida e credo anche che i risultati se vederà più avanti. Deso stago ricevendo tropi input e no rivo a gestirli, go el zervel che me sciopa, ve saverò dir tra qualche mese se xè o no xè :-)
Una menzion particolare ai miei 3 teacher, Michael, Nicole e Chris, persone fantastiche, veramente portade per far sto lavor, pazienti, comprensibili e sempre pronte ad aiutarte.

In classe ierimo circa in 15, provenienti da 9 nazioni diverse(Italia,Perù,Taiwan,Colombia,Japan,Korea,Switzerland,Thailand,Czech Republic), incredibile! Ma stè sicuri che ve go reso onor, ghe go fato conoser Trieste a mezo mondo! Sto weekend pasado, come compito x casa, dovevimo preparar una relazion su un’evento particolare che el nostro compagno ricorda con piacere, bene il mio partner iera Carlos Dominguez Peralta, peruvian, xe tipo el mio Cabirio quà in Australia, ghe combino de tuto.

Bon lui me fa racontar de un suo weekend pasado a Sydney e mi indovinè cosa che che fazo contar????? Lucchese-Triestina, finale play-off C1, che partidon! No ve poso contar quanto che go ridù lunedi alla presentazion dele relazioni, co ghe xè tocà a Carlos, el gà esordi con, Title: "3thousand voices, 11lions, 1big dream", son casca zo de la carega de tanto rider(iera le parole scrite sul nostro striscion a Lucca,e tradote), dopo te lo sentivi mentre legeva el suo compito, pronunciar, Gubellini, Spritz, Gennari, Goal, Serie B....un spetacolo!
Insoma gaverè capi, me la son pasada o meio go trova come pasarmela:-)
La magior parte dei miei compagni xè quà con il visto studentesco, solo per studiar, quindi dificilmente li poderò becar in giro. Questa xe l'unica pecca, perchè anche se xè sole 4 setimane che semo insieme, me son afezionà a diversi de lori e deso saver che no li rivederò probabilmente mai più, me dispiasi sai.
Questa è la vita, c'è chi viene e c'è chi và, l'importante xè non seminar x strada sti bei ricordi e portarseli sempre con sè!

Grande Desh!

Queste xè bele notizie!
Il mio grande brat Deshmann, gà da poco vinto el Campionato Triveneto de MotoCross!
Aprofito de sto blog per darghe, con tanto piazer, un poco de popolarità(fazo quel che poso:-)) a un che merita, a un che cori in moto da 15 anni, con tanta umiltà e carattere, cisto rovinà, senza aiuti e senza papaci che ghe dà i soldini!
E questo xè il giusto premio che te se meriti!
Onor a ti!
Bravo Mulon!

Melbourne Cup

Che strambi sti Australiani, pensè che la sua più grande festa, xè una corsa de cavai!Chiudi tuto, no se lavora, perfin la mia scola ga chiuso, la cità xe rivoltada dala testa ai pie x stà manifestazion!
Martedì 6 Novembre, Melbourne, Flemington Park;
se ga svolto, credo la più grande manifestazion sportiva Australiana dell’anno, una festa sai sentida dalla gente del posto, la quale partecipa in maniera morbosa all'evento. La gara dura pochi minuti, ma zà diversi giorni prima dell’evento te lo percepisi. Tutta la gente ma soprattutto le donne, in questi giorni le indossa vestiti anni ’60-70, capei de tuti i tipi, un spetacolo e ovviamente da boni australiani i xè tuti imbibitai, donne comprese! Ma comunque sia, xè bel, xè sai bel.
Tanta allegria, tanto autoironismo, una bona scusa per far carneval anche a novembre:-)!

La gara consisti nel percorre 3200mt, e la partenza esendo in curva piena, ga tuto un particolare criterio per selezionar i posti de partenza. Questo perché chi parti nella corsia interna gaverà ovviamente qualche metro in meno de percorer; a sto punto i posti vien asegnai in base al curriculum del caval e in base alle sue quotazioni, quindi i favoridi parti nelle corsie piu esterna e i piu cisti sula carta, parti in quele interne.

Altra nota rilevante, xè il giro de scomese che garantisi sto evento, chiunque scometi e no poco e dulcis in fundo, esisti anche el zogo per la play!!!!!

Bravi, gran bela festa, sport, bibita e alegria!

Mi coi miei due novi morosi!

Ebbene si, gavè capi ben, de babe no se ne parla ma a omini vado forte :-)
Domenica sera son andà fora a cena con Amanda e la sua mica Anita(un portento!), semo andai a magnar asagini de no so cosa, penso che iera tapas, so solo che xè rivai una decina de piati in tola che no fazeva do etti duti insieme, comunque bon, e bon soprattutto el vin, insoma tuto bon a parte il prezo! Anzi si, anche il prezo no iera mal, me ga pagà la zena le putele e no ste pensar che no gò insisti x pagar mi :-)
Bon finida la zena, se bechemo con i Special Guest della serata, ovvero due loro amici da Sydney, Andrew e Linzy, vegnui quà a Melbourne per veder la tanto aclamada Melbourne Cup de martedì 6 novembre. Dalla prima frazion de secondo go nasà che non i iera a bolla, ma son stà zito con mia cugina e Anita per paura de tirar una bianca. Podè imaginar, caminada alla Thomas Millan, un particolare riguardo verso de mi e varda caso, i me stava sempre de drio :-) Se un piu un fa dò.....!

Andrew(el biondo) xè nato in Scozia e el xe qua da un 5 anni mentre Linzy(el moro)el xè inglese e il xè qua con il Working Holiday Visa, come mi, x un anno anche se ghe manca solo 4settimane alla scadenza, i se ga conosù a Sydney e i se gà morosà!
Spettacolari, super cocoli e “comprensibili” nel senso che parlandome in inglese e non in Australian, rivavo anche a capirli, abbastanza :-)
Dopo un per de birete i se ga molà ancora de più e i ga cominciar a scherzar con mi, a farme le bele zogando, sazie ridade.
Mi con le culate go sempre avù un bel raporto, ma son anche contento, perchè fino ad ora, tuti quei ghe conosù xè stai sempre cocoli e tuti se ga sempre dimostrà dele bele persone. Non ultimo, anzi primo come beneficio xè che non i crea concorrenza, le babe no ghe interessa…..do in meno :-)

Il sogno, diventa realtà! Australia

Australia!
A momenti ancora no rivo a crederghe, per tanti anni xe stà un sogno quasi irrealizzabile, me pareva un’utopia, invece adeso xe diventà realtà!
Nelle ultime stimane, amici, parenti, conoscenti, tuti me domandava il perchè de stà decsion ed il come mai l'Australia.
Bene, alla prima domanda no servi che rispondo, perchè chi me conosi sa tutti i motivi. Ala seconda invece, poso dir che fin da picio gavevo una certa amirazion per stò continente, no so ben, ne come e ne perché, ma cmq sia, xè sempre stà il mio predileto. Disemo che incarna un poco tuto ciò che me piasi a mi; spiagge, campagna, foreste, deserto, tempo grossomodo mite e soprattutto xè un paese che più de ogni altro dà la possibilità de realizar ciò che go sempre sognà, cioè avventura, divertimento, possibilità de lavoro e l’inglese, lingua come tuti savemo importantissima e che ghe tegno tanto ad imparar. Comunque vadi stà esperienza, sarà ad ogni modo una mia vitoria personale, de questo son sicuro, lo go fato, go trova el coraggio de farlo e questo per mi xè già motivo de orgoglio, e dopo, che vadi come che vadi, sicuro no gavero rimpianti de no gaver provà! Come se disi de noi:

"che la vadi ben o che la vadi mal

sempre alegri e mai passion

viva la e po bon"

Deso come savè son quà, ve stago scrivendo da Melbourne, dove son fortunatamente ospite dei miei parenti. Parenti che go conosù tuti qua adeso, salvo che la mia spettacolare ProZia che conosco da sempre grazie ale sue costanti rimpatriade, con frequenza annuale, in quel de Kringa. Cosa dir, son qua ormai da dò stimane e qualche idea me la posso esser fatta, anche se non definitiva. Sicuramente il tenore de vita medio, xè sai alto, xè una città de pila ma che cmq tendi a non farlo veder, no xe sboroni come noi. La vita la xè sai piu lenta e rilasada, la gente xe tuta amichevole e te fa sentir subito a casa. In piu go conosù dei parenti fantastici, i me sta aiutando a tuta forza, i me porta in giro, son come un principin.
Abito x meza stimana in una casetta 10km fora del centro a South Caulfield con la mitica Teta Zora( Zia Zora x i non istriani), 76anni ma la dimostra 60 x la vitalità che la gà! Istriana con tutti i pregi che ne consegui, cucina ottima e abbondante e massima disponibilità. No ve conto che ridade che me fazo con ela :-)
La zona xè belisima, composta esclusivamente da casette a schiera in stile telefilm american, giardin, garage, steccato in legno ecc. e ben colegada con i servizi publici(sai lenti però, 50min. x far 10km!).
L’altra meza stimana vivo a casa de una dele persone più bele e amabili che go mai conosù, mia cugina Amanda, in centro cità, appartamento ipermoderno, vista grattazei, belisimo e sopratuto comodo, xchè in 30secondi son nel cuor dela cità!

Melbourne:
la città xè immensa, durante l'atterraggio alle 8 de sera, quindi col scuro, le luci dela città iera infinite, a perdita d'occhio. La xè immensa ma go notà che la xe sai periferica, o meglio, il centro no xè grandisimo, ma subito fora se suddividi in un’infinità de sobborghi ognidun bel a modo suo e diverso l'un l'altro, cusi anche, ma diria sopratuto, tutta la periferia xè bela ed interessante! Esendo cusi dispersiva, la xè spaziosa e non soficada, solo il centro xè un pel traficà ma più che altro de pedoni, ga pur sempre 5milioni de abitanti(residenti e studenti)!
Una carateristica incredibile xe l'alternanza tra grattacieli stile New York e giardini/parchi immensi tutti rigorosamente tiradi a lustro, xe un'abbinamento fantastico, xchè appena te se stufi del cemento, te giri l'angolo e te pol andar a stravacarte nel verde, excelent(come i disi quà)!
La popolazion xe veramente un mix incredibile, no te rivi a capir chi xè el straniero, ghe xè 100razze diverse anche se quela predominante xe i "gialli", pien ma pien che un poco anche me urta, xchè a momenti par de eser a Pechino! Disemo cmq che questa predominanza asiatica riguarda più che altro il centro città, per via dei tanti studenti, spostandote nei sobborghi zà te cominci a veder i veri prototipi o meio personagi australiani :-)

A proposito de inglese, confermo che xè incompresinbile, questo no xè inglese, ma australian che xè una lingua a parte! Capiso praticamente niente, salvo che con i miei parenti, i quali se sforza e i me vien incontro con la pronuncia. Cmq co son solo xè casin.....ma xè anche questo el bel!
Go conosù anche un'altro cugin, Luigi che gaverà 50 e roti anni, personagio incredibile, me ga za promeso che portera a caccia de canguri con la Jeep, stile bracconieri, un guida e de drio nel suo pick-up stà i killer! Cio robe da film! El secondo giorno me ga za trova lavor, pittor a 25$ all'ora netti! Xe vero, ste paghe no iera fiabe, ma atenzion che sti soldi te li ciapi solo fazendo lavori de manovalanza, disemo che finalmente go trovà un paese meritocratico:-)!
Mi go dovu rinunciar xchè gò ogni giorno scola, cmq co la finiso se valuteremo!
Lavor a detta dei miei parenti xe quanto che se vol, staremo a veder co me servirà a mi:-)!

Meo de cusi' no podeva cominciar!

Sabato 6 Ottobre 2007, me ciama mia sorela che la xe restada in panne con l'auto a Kringa(xchi no savesi xè un paeseto vicin a Pisin,dove xè nata mia mama), la frizion no và! Bon prima roba che vado pensar xe: "babe ah"....."la ga brusà la frizion" e taco a bestemiar in dute le lingue, come poderè imaginar. Inizialmente, i miei se ofri volontari per ndarla cior ma dopo pochi minuti, ciapà dai sensi de colpa decido de ndar mi e sparagnarghe stà sfachinada.
Ciapo l'auto de papà, anche xchè no ghe xè altre disponibili e vado fora, vesti' come un zurlo pronto a smerdarme x zercar de risolver l'incoveniente!
Parto iper scazà, stanco e scoionà e procedo, oviamente fredo, piova ecc......tuto regolare! Rivo fora e trovo mia sorella, la sua amica Elisa e mia cugina Petra, ferme vicin la machina, posteggiada nel cortil dela nostra casa, con la sola luceta de cortesia dela sua auto, là infredolide a spetarme. Smonto e le riva dute tre vizin de mi disendome:"alora come va?"...e come te vol che vadi? Bon ghe fazo, mostrime el cadenaz che vedemo. . . . . . finiso a malapena la frase e improvisamente se impiza tute le luci del cortil, musica in bomba e tuti i miei amici che salta fora come "canguri" dal nulla!

Sorpresa fantastica, indescrivibile, per un do secondi son andà in folle, me pareva un sogno, no ve digo che emozion! Tutto esaltà dal fatto che nonostante la sofisticateza della festa a sorpresa, mi no go sospetà niente, no me son corto de niente, solo dopo go comincià a renderme conto de quante robe strane iera successe nele ultime do stimane....eco tuto spiegà! Organizazion incredibile, anche xchè il tuto se ga svolto nella mitica Kringa, non drio casa, tuti lavora, ga i suoi impegni e far de sconto senza la mia logistica :-) in quele tere,no xe una monada! E infati qua entra in giogo mia sorella, mia cugina Petra e miei genitori, che oltre a organizar insieme agli amici, i ga ben pensà de far anca i atori, anche esagerando(deso so!) però il tuto de gran cariera :-)!
Dopo l’iniziale ambientamento, ma più che altro dopo gaver realizà che no iera un sogno, la sorpresa se ga trasforma realmente in una festa, musica, birete a tuta forza e via andare!
Non contento, ricevo anche 2 regali, che entrambi porterò con mi in questa avventura, pecà che uno dei 2 non durerà tanto :-), ma l’altro si, sarà sempre con mi, in vostro ricordo!
Cosa dir altro:

GRAZIE